Чип үйлдвэрлэгч “Nvidia”-ийн хувьцааны ханш пүрэв гарагт 16 хувиар өссөнөөр зах зээлийн үнэлгээ нь 277 тэрбум ам.доллароор нэмэгдэж, хоёр их наяд ам.доллар дөхсөн нь анхаарал татаад байна. Ийнхүү тус компанийн хувьцааны ханш бүх цаг үеийн дээд түвшинд хүрлээ. Нэг өдрийн арилжаагаар зах зээлийн үнэлгээ нь түүхэн дэх хамгийн их дүнгээр өссөн нь гурван долоо хоногийн өмнө тохиосон “Meta Platforms”-ийн түүхэн өсөлтийг давав.
Нэгдүгээр сарын 28-наар эцэслэсэн санхүүгийн жилийн IV улиралд “Nvidia”-ийн борлуулалтын орлого өмнөх улирлаас 22 хувиар өсөж, 22.1 тэрбум ам.доллар хүрснийг тус компани танилцуулсан юм. Ийнхүү орлого нь 21.9 тэрбум ам.доллар болно гэсэн шинжээчдийн дундаж таамгийг давсан байна. Харин хоёрдугаар сарын 21-ний өдрийн байдлаар орлого нь 24 тэрбум ам.доллар болжээ. Тус компанийн орлогын үзүүлэлт удаа дараа шинжээчдийн таамгийг давж байгаа нь хиймэл оюуны чип өндөр эрэлттэй байгаатай холбоотой аж.
Үүнээс гадна тус компанийн Гүйцэтгэх захирал Женсен Хуаны хөрөнгө 9.6 тэрбум ам.доллароор нэмэгдэж, 69.2 тэрбум ам.доллар хүрснээр дэлхийн хамгийн чинээлэг 20 эрхмийн нэг болоход ойртож, “Bloomberg Billionaires Index”-ийн 21 дүгээрт бичигдэж байна. Дэлхийн хэмжээнд хиймэл оюуны чипийн борлуулалтын 70 хувийг “Nvidia” бүрдүүлж байгаа бөгөөд эрэлт нь эрчимтэй тэлж буйг тус компанийн Гүйцэтгэх захирал Женсен Хуан онцолж байв.
“Nvidia”-ийн хувьцааны ханш өсөхөд хиймэл оюуны халуурлаас гадна тус компанийн чипийг хэрэглэгч “Microsoft”, “Meta Platforms” зэрэг компанийн хиймэл оюуны чиглэлийн зарцуулалт өсөн нэмэгдэж байгаа нь голлон нөлөөлж байгаа аж.
