АНУ-ын ерөнхийлөгчөөр сонгогдоод байгаа Жо Байден, одоогийн засаг захиргааны дэд ерөнхийлөгч Майк Пэнс нар ойрын үед коронавирусийн эсрэг вакцин хийлгэхээр болсон байна.
Байдены хувьд ирэх долоо хоногт вакцин хийлгэх бол Пэнс гэргийн хамт Баасан гарагт хийлгэхээр болжээ. Тэд нийт Америкчуудын вакцинд итгэх итгэлийг нэмэгдүүлэхийн тулд олон нийтийн нүдэн дээр, камерны дурангийн өмнө вакцинжуулалтад хамрагдахаар болсон байна.
Энэ долоо хоногт АНУ даяар эхэлсэн вакцинжуулах аянд эмч, сувилагч нар, эрсдэлтэй бүлгийн хүмүүс нэн тэргүүнд хамрагдаж байгаа ч төрийн үйл ажиллагааг тасалдуулахгүй байх үүднээс өндөр албан тушаалтнуудыг бас хамруулахаар болсон юм.
Жо Байден “Би дарааллын урдуур орох хүсэлгүй байгаа ч вакцин аюулгүйг Америкчуудад харуулахын тулд ойрын үед хамрагдана” гэж ярьжээ.
Одоогийн АНУ-ын ерөнхийлөгч Дональд Трамп өнгөрсөн аравдугаар сард коронавирусийн халдвараар өвчлөөд эдгэрсэн юм. Тэрбээр Цагаан ордны ажилтнуудыг онц шаардлагагүй бол түрүүлж вакцинжуулах хэрэггүй гэж үзэж байгаагаа өнгөрсөн Ням гарагт твиттер хуудсандаа мэдэгдэж байв.
Эх сурвалж: The Guardian
