Өнгөрсөн 2019 оны гуравдугаар сарын 18-ны өдөр ЦЕГ-ын Дэд бөгөөд Нийслэлийн цагдаагийн газрын дарга Хурандаа Д.Ядамдоржийн жолооч, ахлах ахлагч н.Пүрэвцогт албаны машин жолоодож яваад хүний амь хөнөөсөн хэрэг гарсан.
Тодруулбал, 2019.03.18-ны 17.09 цагт Баянзүрх дүүргийн 21 дүгээр хорооны нутаг, Дарь-Эхийн шинэ буудлын орчимд 01-62 УНҮ улсын дугаартай “Соната-8” загварын автомашины жолооч зам тээврийн осол гаргасны улмаас явган зорчигч 52 настай эмэгтэй амь насаа алдсан гэдгийг Тээврийн цагдаагийн албаны тухайн үеийн дарга, цагдаагийн хурандаа Э.Бөхбат мэдээлж байсан юм.
Тухайн үед хэвлэлээр бичигдсэн мэдээллээс дурдвал, ЦЕГ-ын дэд бөгөрөд нийслэлийн Цагдаагийн газрын дарга Хурандаа Д.Ядамдоржийн гэр Дамбадаржаагийн эцэс орчимд байдаг бөгөөд жолооч даргадаа үйлчилж яваад ийнхүү осол гаргасан болохыг мэдээлсэн байдаг.
Тэгвэл зам тээврийн осол гаргаж, эрдэнэт хүний амь хохироосон Д.Ядамдорж даргын жолооч н.Пүрэвцогт тээврийн цагдаагийн албаны алба хаагч өөрөөр хэлбэл замын цагдаа болж дэвшжээ. Тодруулбал, тэрбээр Баянзүрх дүүрэг дэх Тээврийн цагдаагийн албанд ажиллаж байна. Зам тээврийн осол гаргаж, хүний амь хөнөөсөн жолооч зам тээврийн ослоос урьдчилан сэргийлэх албанд дэвшин ажиллах нь хэр зохистой болоод ёсзүйтэй болохыг Монголын цагдаагийн байгууллагаас болоод Д.Ядамдорж хурандаагаас асууя.
Эх сурвалж: Zarig.mn
