Их Британийн Ерөнхий сайд Борис Жонсон өнгөрөгч гуравдугаар сарын 27-нд “COVID-19”-ийн халдвар авсан болох нь тогтоогдсон. Ерөнхий сайдын ажлын албаны зүгээс ням гаригт 55 настай Борис Жонсонд хэд хоногийн турш халдварын шинж тэмдэг илэрсний дараагаар эмнэлэгт хүргэгдсэн талаар мэдэгдлээ.
Тэрээр баасан гаригт өөрийн твиттер хаягаараа дамжуулан халуурах шинж тэмдэг илэрч эхэлсэн талаар мэдээлж байсан юм. Ерөнхий сайдын ажлын албаны мэдэгдэлд “Ерөнхий сайд халдвар авсан нь тогтоогдсоноос хойш 10 хоногийн дараа түүнд шинж тэмдэг илэрсэн. Эмчийнхээ зөвлөсний дагуу тэрээр өнөө орой эмнэлэгт хэвтэж, урьдчилан сэргийлэх зорилгоор шинжилгээнд хамрагдах шаардлагатай боллоо. Тэрээр Их Британийн эрүүл мэндийн ажилчдад хандан тэдний нүр их хүч, хөдөлмөрт талархал илэрхийлж, ард түмэнд хандан гэртээ байхыг зөвлөж, бусдад халдвар тархаахаас сэргийлэхийг уриаллаа” гэжээ.
Борис Жонсоны хувьд халдвар авсан нь тогтоогдсоноос хойш Даунинг Стрийт дэх Ерөнхий сайдын ажлын албанаас Засгийн газрын үйл ажиллагааг зайнаас удирдсаар байсан юм. Тэгвэл тэрээр эмнэлэгт хэвтэн эмчлүүлэх хугацаандаа ч өөрийн албан үүргээ гүйцэтгэсээр байх аж.
Их Британи улсын хувьд сүүлийн 24 цагийн байдлаар шинээр “COVID-19”-ийн халдвар авсан батлагдсан 5903 тохиолдол, 621 нас баралт бүртгэгджээ. Тус улсад өнгөрөгч нэгдүгээр сарын 22-нд “COVID-19”-ийн халдвар зөөвөрлөгдөн орж ирсэн анхны тохиолдол бүртгэгдсэн. Үүнээс хойш Их Британийн хэмжээнд нийт ердөө 135 хүн халдвараас эдгэсэн бөгөөд 195524 иргэнийг оношилгоонд хамруулжээ.
Эх сурвалж: CNN, The Guardian
