асгийн газрын 2024-2028 оны үйл ажиллагааны хөтөлбөрт төрийн болон орон нутгийн өмчит компаниудын засаглал, ил тод байдлыг сайжруулна гэж тусгажээ.
Энэ хөтөлбөрт төрийн болон орон нутгийн өмчит компаниудыг нээлттэй, хувьцаат компани болгон, үр ашиг, баялгийн тэгш хуваарилалтыг нэмэх, үнэт цаасны зах зээлийн бүтээгдэхүүн үйлчилгээг нэмэх талаар ч тусгажээ.
Иймд Төрийн өмчийн бодлого, зохицуулалтын газрын удирдлага, алба хаагчдад Төрийн өмчийн хувьчлал ба баялгийн тэгш хуваарилалт сэдвээр өчигдөр мэдээлэл өгчээ.
Төрийн өмчийн бодлого, зохицуулалтын газрын дарга Б.Цэнгэл хэлсэн үгэндээ:
“Манай улсад төрийн өмчит, төрийн өмчийн оролцоотой 78 компани, үйлдвэрийн газар болон тэдгээрийн охин хараат 44 компани үйл ажиллагаа явуулж байна. Улсын Их Хурал, Засгийн газраас стратегийн ач холбогдол бүхий төрийн өмчит компани, үйлдвэрийн газрууд, бусад томоохон компаниудыг нээлттэй хувьцаат компани болгох бодлого баримталж байна.
Бид бэлтгэлээ сайтар хангаж, компани нэг бүрийн дунд, урт хугацааны хөгжлийн төлөвлөлт, үр ашигтай байдлыг дахин сайтар нягталж, бизнесийн төлөвлөлт, түүний үнэлгээг сайжруулснаар шаардлагатай хөрөнгө оруулалтуудыг амжилттай татах, олон нийтэд хувьцааг амжилттай арилжих боломж нөхцөл бүрдэнэ” гэжээ.
Хөрөнгийн биржээс хувьчлахаар төлөвлөж буй төрийн өмчит компаниудыг Санхүүгийн зохицуулах хороо, Монголын хөрөнгийн биржийн үнэт цаасны бүртгэлийн шалгуур шаардлагыг хангаж байгаа эсэхээр нь эрэмбэлнэ.
Жагсаалтын эхний компаниудын үйл ажиллагаа, бизнес төлөвлөгөө, зах зээлийн нөхцөл зэрэгтэй уялдуулан сонгож, мэргэжлийн байгууллагуудтай хамтран ажиллах санал дэвшүүлснийг Төрийн өмчийн бодлого, зохицуулалтын газраас дэмжжээ.
Энэ уулзалтад Төрийн өмчийн бодлого, зохицуулалтын газрын Төрийн өмчийн удирдлага, зохицуулалтын хэлтсийн дарга Ц.Баяр-Эрдэнэ, Төрийн өмчийн бүртгэл, ашиглалтын хэлтсийн дарга Д.Нарангэрэл, Захиргаа, удирдлагын хэлтсийн дарга Н.Ганболд нар болон нийт албан хаагчид оролцсон гэж Монголын хөрөнгийн биржээс мэдээлэв.
