2007 онд iPhone гарснаар дэлхий ертөнц өөрчлөгдсөн ч Apple Vision Pro 2024 онд нээлтээ хийснээр дэлхий дахин өөрчлөгдлөө.
Apple ирээдүйд компьютер, зугаа цэнгэлийн бус харин амьдралын шинэ хэв маягийн хаалгыг нээж өгсөн. Онлайн болон офлайн хосолсон амьдрал. Бид үүнийг Ковид-19-ийн үеэр аль хэдийн мэдэрсэн. Apple Vision Pro нь хүний биетэй интеграцчилалд суурилсан шинэ төрлийн компьютерийн анхны алсын хараа юм.
Шинэ төхөөрөмж нь хэрэглэгчдэд виртуал (VR) болон баяжуулсан бодит байдал (AR) горимоор виртуал болон бодит ертөнцтэй харилцах боломжийг олгох гэнэ. “Apple”-ийн гүйцэтгэх захирал Тим Күүк “Та бүхэнд танил санагдаж байгаа байх. Гэхдээ цоо шинээр … яг л гар, нүүр, дуу хоолойгоо ашигладаг таны бодит орон зай шиг” гэв. “Энэхүү төхөөрөмж нь таны оюун ухаан удирдаж байгаа мэт хэрэглэгчийн гар, нүдэнд хариу үйлдэл үзүүлдэг” гэжээ.
“Apple”-ийн танилцуулснаар хэрэглэгч төхөөрөмжөө зүүхэд урд нь хүссэн хэмжээгээр нь аппликейшнүүд нээгдэх юм байна. Мөн зураг, бичлэг, кино гээд дуртай контентоо үзэх боломжтойгоос гадна хүмүүстэй холбогдож, ярилцах боломжтой гэнэ.
Vision Pro төхөөрөмж нь “Apple” компани 2015 онд Apple Watch-ыг худалдаанд гаргаснаас хойш зах зээлд нэвтрүүлж буй анхны шинэ бүтээгдэхүүн болж байна. Нүдний шил нь өөрийн гэсэн visonOS үйлдлийн системтэй, хос 4K дэлгэц, Apple M2 процессор, 16 ГБ санах ой, утсаар холбогдсон нэмэлт гадна зайтай юм байна. Батарей нь цэнэгээ хоёр цаг барьдаг аж.
Тус төхөөрөмж нь 3499 ам.долларын үнэтэй юм.
