НҮБ-ын Ерөнхий ассамблейн ээлжит 80-р чуулган есдүгээр сарын 9-нд эхэлж байна.
Мягмар гарагт НҮБ-ын Ерөнхий ассамблейн 79-р чуулганы сүүлчийн хуралдаан болж, даргалагч Филемона Янга бүрэн эрхээ Германы Гадаад хэргийн сайд асан Анналена Бербокт шилжүүлнэ. 80-р чуулганы гол үйл явдал нь энэ сарын 23-27 болон 29-нд болох дээд түвшний долоо хоногийн хүрээнд болох улс төрийн асуудлаарх мэтгэлцээнүүд юм. Энэ хүрээнд 195 төлөөлөгч үг хэлнэ гэсэн хүлээлттэй байна.
НҮБ-ын Ерөнхий ассамблейн 80-р чуулган тус байгууллага санхүүгийн хямралд ороод байгаа үед болж байна. НҮБ нь АНУ зэрэг томоохон донор орнуудын зүгээс гишүүнчлэлийн татвараа төлөөгүйн улмаас төсвийн алдагдалд ороод байгаа билээ. Хоёрдох том донор болох Хятад улс мөн энэ оныг дуустал татвар төлөлтөө хойшлуулаад байгаа нь санхүүгийн тогтворгүй байдлыг улам нэмэгдүүлж байна. Үүний улмаас НҮБ зардал, хүмүүнлэгийн тусламжаа танахаас өөр аргагүйд хүрчээ.
Үүнтэй холбогдуулан НҮБ-ын ерөнхий нарийн бичгийн дарга Антонио Гутерриш UN80 шинэчлэлийн хөтөлбөрийг санаачилж, энэ хүрээнд тус байгууллагын зардлыг 20 хувиар танахаар төлөвлөж байна. Ингэснээр 2026 он гэхэд 6900 ажлын байр алдагдахад хүрнэ. Түүнчлэн, энэ хөтөлбөрийн хүрээнд ЮНИСЕФ, Хүн амын сан, НҮБ-Эмэгтэйчүүд зэрэг агентлагуудын төв байрыг Нью Йоркоос Найроби руу нүүлгэх асуудал тавигдаж байна. Энэ нь үйл ажиллагааны зардлыг бууруулахад чиглэсэн арга хэмжээ юм.
