“Х.Бат-Ялалтыг суллах эсэх шүүх хуралд прокурор ирээгүй гэдэг шалтгаанаар хоёр дахь удаагаа хойшилж байна” гэх мэдээллийн талаар Нийслэлийн прокурорын газраас тайлбар өглөө.
“Нийслэлийн прокурорын газраас Х.Бат-Ялалтад холбогдох эрүүгийн хэрэгт 2020 оны дөрөвдүгээр сарын 10-ны өдөр Эрүүгийн хуулийн 17.6 дугаар зүйлийн 1 дэх хэсэгт зааснаар яллах дүгнэлт үйлдэн 2020 оны дөрөвдүгээр сарын 13-нд Чингэлтэй дүүргийн Эрүүгийн хэргийн анхан шатны шүүхэд шилжүүлсэн боловч шүүхийн харьяаллыг тогтоолгох шаардлагатай гэж тус шүүхээс буцаасан. Тиймээс тус прокурорын газраас хэргийн шүүхийн харьяаллыг тогтоолгохоор Улсын дээд шүүхэд хандсан бөгөөд 2020 оны дөрөвдүгээр сарын 17-ны өдөр Чингэлтэй дүүргийн Эрүүгийн хэргийн анхан шатны шүүхэд харьяалал тогтоож ирүүлсэн.
Ингээд өнөөдөр буюу 2020 оны дөрөвдүгээр сарын 20-ны өдөр тус шүүхэд хэргийг хүргүүлээд байна. Эрүүгийн хэрэг хянан шийдвэрлэх тухай хуулийн 14.1 дүгээр зүйлийн 3 дахь хэсэгт шүүхэд хэрэг хянан шийдвэрлэх явцад таслан сэргийлэх арга хэмжээг шүүх авна гэж заасан байдаг.
Өөрөөр хэлбэл Х.Бат-Ялалтад холбогдох хэрэг нь шүүхийн шатанд байгаа учраас цагдан хорих таслан сэргийлэх арга хэмжээг өөрчлөх эсэх асуудалд прокурор оролцохгүй, тухайн шүүх хянан шийдвэрлэх хууль зүйн зохицуулалттай юм. Х.Бат-Ялалтыг суллах асуудлыг хэлэлцэх шүүхийн хэлэлцүүлэгт прокурор ирээгүй гэдэг үндэслэлээр хойшилсон гэдэг нь ташаа мэдээлэл байна” гэв.
