“Тоёота Моторс Корпораци” Японд нисдэг машины анхны туршилтын нислэгээ амжилттай хийжээ. eVTOL буюу цахилгаан хөөрөх, буух онгоцны загварыг АНУ-ын “Joby Aviation” компани бүтээсэн бөгөөд “Тоёота” гол хөрөнгө оруулагч нь юм.
Нисдэг таксийг нэвтрүүлснээр хот суурин газрын тээврийн системийг шинэчлэхэд чухал үүрэгтэй гэж үзэж байна.
Ямар ч дуу чимээгүй ажиллах зориулалттай eVTOL онгоц нь цагт 320 км хүртэл хурдлах чадалтай. Энэ оны аравдугаар сард Шизүока мужийн Сусоно дахь Тоёотагийн R&D байгууламжид амжилттай туршсан аж.
“Тоёота”-гийн ТУЗ-ийн дарга Акио Тоёода “Энэхүү технологи нь амьдралын хэв маягийг өөрчлөх боломжтой. Токиод машинаар явахад 4-5 цаг зарцуулах газарт нисэхэд ердөө 25 минут болно” хэмээн онцлов.
Ийнхүү “Тоёота” агаарын хөдөлгөөнт орон зайд туршилтаа амжилттай хийж, тус салбарт нэвтэрч буйгаа албан ёсоор зарлалаа. Ингэснээр тус компани уламжлалт тээврийн хэрэгслээс илүү технологийн дэвшилтэт хувилбаруудыг нэвтрүүлж байна.
Эх сурвалж: Цахим хөгжил, инновац, харилцаа холбооны яам
