- “Эрдэнэс Тавантолгой” хоёр багц 12.8 мянган тонн баяжуулсан коксжих нүүрсийг 2.1 сая ам.доллароор арилжаалжээ.
- Баяжуулсан коксжих нүүрсээ тонныг нь 163.5 ам.долларт хэлцэл хийж борлууллаа.
- “Эрдэнэс Тавантолгой” ХК нь баяжуулах үйлдвэртэй болсноор ашиг орлого нь эрс өснө гэж тооцож байна.
- Монголын хамгийн олон хувьцаа эзэмшигчтэй “Эрдэнэс тавантолгой” ХК анхны баяжуулсан нүүрсээ Монголын Хөрөнгийн Биржийн нээлттэй цахим арилжаагаар борлууллаа. Баяжуулсан коксжих нүүрсний арилжаанд хоёр худалдан авагч оролцож, 163.5 ам.долларт хэлцэл хийгдсэнээр “Эрдэнэс Тавантолгой” хоёр багц 12.8 мянган тонн баяжуулсан коксжих нүүрсийг 2.1 сая ам.доллароор арилжаалжээ.
“Эрдэнэс Тавантолгой” ХК-ийн Нүүрс баяжуулах үйлдвэр жилд 10.0 сая тонн нүүрс хүлээн авч баяжуулах хүчин чадалтай бөгөөд олон улсын стандартын шаардлагад нийцсэн хоёр төрлийн баяжмал үйлдвэрлэж байна. Үндсэн бүтээгдэхүүн буюу коксжих нүүрсний чанарын хувьд үнслэг нь 10.5 хувиас доош, барьцалдах чадвар нь 80 хувиас дээш, 7000-аас дээш илчлэгтэй коксжих чанарын нүүрс, үнслэг нь 22 хувиас бага, 6000-аас дээш илчлэгтэй, 23 хувиас бага дэгдэмхийтэй, хүхрийн агууламж нэг хувиас бага үзүүлэлттэй эрчим хүчний нүүрс тус тус үйлдвэрлэж байна.
Компани өнгөрсөн хугацаанд нийт 109 удаагийн цахим арилжааг амжилттай зохион байгуулж 8.6 сая тонн коксжих нүүрс, 10.8 сая тонн 1/3 коксжих нүүрс, 3.5 сая тонн эрчим хүчний нүүрс тус тус биржээр арилжаалж 2.7 тэрбум ам.долларын орлоготой ажиллаж байна.
“Эрдэнэс Тавантолгой” ХК нь 2023 оны хоёрдугаар сараас нүүрсээ Монголын Хөрөнгийн Биржийн цахим арилжаагаар нээлттэй худалдаалж эхэлсэн. Өөрийн баяжуулах үйлдвэртэй болсноор ашиг орлого нь эрс өснө гэж тооцож байна.
Бидний тухай
Веб сайт маань цаашдаа тасралтгүй хөгжиж, зөвхөн мэдээ, мэдээллээр зогсохгүй олон төрлийн дэвшилтэт үйлчилгээнүүдийг зах зээлд танилцуулах болно.
© 2020 ErtechNews