АНУ-ын талыг баримтлагч Афганистаны ерөнхийлөгч Ашраф Гани өнгөрсөн Ням гарагт Талибан хөдөлгөөнийхөн Кабулыг эзлэхтэй зэрэгцэн эх орноосоо дүрвэсэн билээ.
Тэрбээр нисдэг тэргээр хөрш Тажикистан улсад очсон мэдээлэл байна.
Гани Кабулаас дөрвөн автомашин дүүрэн бэлэн мөнгөтэй явсан ба бүх мөнгө нь нисдэг тэргэнд багтаагүй тул зарим хэсгийг нисэх буудалд орхисон тухай Афганистан дахь ОХУ-ын элчин сайдын яамны хэвлэлийн төлөөлөгч Никита Ищенко РИА Новости агентлагт мэдээлжээ.
“Дөрвөн машиныг бэлэн мөнгөөр дүүргэсэн байсан. Бүх мөнгө нисдэг тэргэнд багтаагүй тул заримыг нь нисэх буудлын талбайд орхиод явсан” гэж тэр ярьсан байна.
Ищенко ямар эх сурвалжаас уг мэдээллийг авснаа дурдаагүй юм.
Ашраф Гани 2014 оны есдүгээр сард Афганистаны ерөнхийлөгчөөр сонгогдож, тус улсын түүхэнд анхны ардчилсан замаар сонгогдсон төрийн тэргүүн болж байв.
Өнгөрсөн хугацаанд тэр АНУ-ын засаг захиргаатай нягт түншилж, Афганистанд бараг нэг их наяд ам.долларыг татсан гэдэг.
АНУ-ын Брауны Их Сургуулийн судалснаар 2001 оноос хойш Вашингтоны эрх баригчид Афганистан, Пакистанд нийт $978 тэрбумыг зарцуулжээ.
Исламын радикал үзэлт Талибан хөдөлгөөнийхөн нийслэл Кабулыг эзэлж, 20 жил үргэлжилсэн Афганистаны дайн дууссаныг зарлаад байгаа.
Дэлхийн ихэнх улс орнууд Кабулаас элчин сайдын яамдаа татаж байна. Харин ОХУ-ын эрх баригчид Кабул дахь элчин сайдын яамаа хаах төлөвлөгөөгүй байгаа юм.
Даваа гарагт ОХУ-ын гадаад хэргийн яамнаас гаргасан мэдэгдэлд Кабулын нөхцөл байдал тогтворжиж, Талибанчууд нийгэмд дэг журам тогтоож эхэлснийг мэдээлжээ.
Талибаны зэвсэгт дайчид Кабул дахь ОХУ-ын элчин сайдын яамыг хамгаалалтдаа авч, Оросын дипломатчдын “толгойноос ширхэг үс ч унагахгүй” гэсэн амлалт өгсөн тухай элчин сайд Дмитрий Жирнов мэдээлсэн байна.
Талибан хөдөлгөөн нь анх байгуулагдахдаа Афганистанд байрлаж байсан Зөвлөлт Холбоот Улсын цэргийг хөөн гаргах зорилготой байв. 1992 онд Талибанчууд Афганистаныг хяналтдаа авахад ОХУ элчин сайдын яамаа Кабулаас яаралтай нүүлгэж байжээ.
Хэдийгээр Талибаныг ОХУ террорист байгууллага гэж үздэг ч 30 жилийн дараа Москвагийн эрх баригчид Афганистаны нөхцөл байдалд илүү прагматик хандаж байна.
Өнөөдөр буюу Мягмар гарагт Кабул дахь ОХУ-ын элчин сайд Талибаны удирдлагуудтай уулзахаар болжээ.
Гэхдээ ОХУ-ын гадаад хэргийн яам Талибаны засгийн газрыг хүлээн зөвшөөрөх гэж яарахгүй байна. Талибанчуудын үйл ажиллагааг анхааралтай ажигласны дараа хүлээн зөвшөөрөх эсэхээ шийднэ гэсэн байр суурийг тус яам илэрхийлжээ.
Эх сурвалж: Russia Today, AFP
